القهوة

الكراسي بتشتكي
من تقل الهوا
مترصصين بالحذا
حتى الرصيف فاضيين
صوت دوشة الفوضى
في شارع من اتجاهين
خبطة حديد المعلقه
ع الارض عملت صدا
سرقت عينين وودن
وقلب شاب خفيف
تايه وعينه بتفضحه
حلمه إنقسم حملين
شابب رقبته فوق
ضل محني للسما
رعشة شفايفه
للمر أخدت سنه
ثم الميول تابت
رَسَمت كمان خطين
قهوة زمان بحيطان
تحكي حكاوي
لسه تقول فاكره
كان للوجود سببين
كوبايته دائمًا تشتمه..
اياك تفوق!
لسه في شمسك عين
تصحى كما المعتاد
وقت النهار ما يدور
مهما يطول الوقت
عمرك يجيب سنتين!